Васілій Новікаў — вадзіцель магутнага сартыментавоза «МАЗ-6303А8». Мы засталі яго за падрыхтоўкай тэхнікі да тэхагляду. І няважна, што рукі былі чорныя ад мазуту, і клопатна з раніцы, аднак настрой бадзёры і справы ладзіліся.

— На гэту машыну я перасеў крыху больш за два гады, — гаворыць Васілій Фёдаравіч. — А дагэтуль кіраваў «МАЗ-0066 ОКА5». Зразумела, запомніўся той момант — радасны і хвалюючы. Бо без высокаэфектыўнай тэхнікі, якая дапамагае забяспечваць сыравінай дрэваперапрацоўчую вытворчасць, эфектыўна працаваць складана ў лясной галіне.

У Бярэзінскі лясгас Васілій Фёдаравіч уладкаваўся ў 2012 годзе ўжо з багатым жыццёвым вопытам. Спачатку пасля службы ў арміі 10 гадоў адпрацаваў у саўгасе «Камунар», потым, з 1995 года, служыў у раённым аддзеле па надзвычайных сітуацыях вадзіцелем пажарна-аварыйнай выратавальнай часці. А калі выйшаў на заслужаны адпачынак, вырашыў працягнуць працоўную дзейнасць у лясной гаспадарцы.

— Мае маршруты пралягаюць па ўсёй Беларусі — Барысаў, Шклоў, Бабруйск... Пералічваць можна доўга, — усміхаецца ён. — Практычна ў кожнага вадзіцеля амаль палова жыцця праходзіць у дарозе. Мне падабаецца наш калектыў, я задаволены тым, што маю, чаго дасягнуў у сваім жыцці. У мяне любімая справа, любімая сям’я, радуюць дзеці і ўнукі.

Дарэчы, за сваю добрасумленную руплівую працу па ліквідацыі наступстваў урагану ў Смалявічах, а таксама ў барацьбе з караедам у Любані Васілій Новікаў быў адзначаны граматамі адміністрацыі Бярэзінскага лясгаса і Мінскага дзяржаўнага вытворчага лесагаспадарчага аб’яднання.

А сёлета Васілій Фёдаравіч прымаў віншаванні ад сваіх калег і родных з чарговай узнагародай — Падзякай ад Бярэзінскага райвыканкама, якую ўручыў яму старшыня раённага савета дэпутатаў Віктар Лашкоўскі.

Материал Белорусской лесной газеты.

• Назад
• Вперёд