Гэтыя словы я пачула ад выпускніка ДУА «Сярэдняя школа № 2 г. Беразіно» Алега Казлова напярэдадні выпускнога балю. 

Менавіта ў гэтай навучальнай установе выпускнікі пасадзілі алею з 20 вечназялёных туй, 13 з якіх падарылі школе бацькі хлопчыка — Ігар Казлоў і Наталля Шмарлоўская (яны займаюцца раслінаводствам і працуюць на запраўцы), а астатнія былі набыты ў пітомніку ДЛГУ «Бярэзінскі лясгас». 

Па словах дырэктара навучальнай установы Святланы Абрамовіч, тут ужо даўно мелі намер замяніць звычайную драўляную агароджу на жывую. Таму з задавальненнем падтрымалі жаданне вучняў пакінуць аб сабе добрую памяць. Новыя расліны будуць пасаваць стылю ландшафтнага дызайну шко лы, над якім шмат гадоў працуе Людміла Макарэвіч, настаўніца геаграфіі і кіраўнік аб’яднання па інтарэсах «Ландшафтны дызайн у школе». 

Сёлетнім выпускнікам не пашанцавала пакружыць у развітальным школьным вальсе, паколькі ў сувязі з пандэміяй масавае мерапрыемства мела іншы фармат. Затое менавіта выпускнікі-2020 першымі паклалі пачатак новай добрай карыснай традыцыі. 

Дарэчы, сёлета настаўнікі ўстановы развітваюцца з атрадам слаўных юных эколагаў, дзякуючы руплівым рукам якіх школа набыла самы лепшы ў раёне знешні выгляд, ганарыцца багаццем відаў раслін і дрэў круглы год, а таксама перамогамі ў конкурсах рэспубліканскага і абласнога ўзроўняў на лепшае добраўпарадкаванне і азеляненне тэрыторый устаноў адукацыі. 

— Я таксама, як тата і матуля, бясконца ўлюбёны ў кветкі, у расліны, у лес, — гаворыць Алег. — Мне падабаецца нават кожная зялёная галінка. І мне хочацца ўнесці свой уклад у азеляненне нашай планеты і захаванне яе зялёных багаццяў. 

Матэрыял з партала Беларускай лясной газеты, аўтар: Алена ГРОМАВА, фота аўтара

• Назад
• Вперёд